Zelensky: BE do të aktivizojë mekanizëm emergjent për ndihmë të shpejtë për Ukrainën

Presidenti ukrainas Volodymyr Zelensky njoftoi të hënën se Bashkimi Evropian do të aktivizojë një mekanizëm emergjent për të shpejtuar fondet për Ukrainën, pas një bisede telefonike me presidenten e Komisionit Evropian, Ursula von der Leyen. Njoftimi u bë në një deklaratë në Telegram, siç njofton agjencia Anadolu.

Shumë qytete dhe komunitete në Ukrainë po përballen me një situatë shumë të vështirë me furnizimin me energji elektrike, ujë dhe ngrohje, për shkak të sulmeve ruse. Situata është më e vështira në Kiev, në rajonet e Dnipropetrovskut, Sumyt dhe Donetskut, si dhe në Kherson.

Zelensky i tregoi von der Leyen për sfidat me të cilat po përballet vendi dhe të dy ranë dakord që BE-ja të aktivizojë një mekanizëm të veçantë emergjent, i cili do të bëjë të mundur që Ukraina të marrë shpejt financimin për atë që i nevojitet më shumë tani. Ekipet e tyre tashmë po punojnë për këtë. Zelensky nuk përcaktoi shumën e saktë të financimit apo një afat kohor.

Dy liderët diskutuan gjithashtu ndihmën shtesë energjetike dhe humanitare për t’u përgatitur për dimrin, si edhe integrimin evropian të Ukrainës. Raporti vjetor i zgjerimit i Komisionit Evropian, i publikuar javën e kaluar, e vlerësoi pozitivisht përparimin e Ukrainës, ndërsa Zelensky theksoi nevojën për të hapur të gjitha grupet e negociatave dhe për të filluar mbylljen e kapitujve.

Ekipet ukrainase punuan në Bruksel ditët e fundit, në mënyrë efektive, për një plan rimëkëmbjeje dhe për garancitë e sigurisë nga Evropa. Zelensky dhe von der Leyen koordinuan gjithashtu qëndrimet e tyre përpara takimit të ardhshëm trepalësh Rusi–SHBA–Ukrainë në Abu Dhabi, më 10–11 nëntor. “Po bëjmë gjithçka që formati trepalësh të sjellë rezultate”, tha Zelensky.