Përmbyllen përgatitjet për zgjedhjen e kryetarit të PD-së më 23 maj, Kaso jep detajet

Sekretari për Çështjet Ligjore në Partinë Demokratike, Ivi Kaso, deklaroi këtë të hënë se është përmbyllur faza e përgatitjeve për procesin e datës 23 maj, kur demokratët do të zgjedhin kryetarin e tyre përmes referendumit, sipas parimit “një anëtar, një votë”.

Në emër të Komisionit të Organizimit dhe Kontrollit të Operacioneve Elektorale të Partisë Demokratike, Kaso bëri të ditur se në të gjitha degët e partisë do të ngrihen qendrat e votimit, ku nga ora 08:00 deri në 18:00 anëtarët janë të thirrur të votojnë në këtë proces të brendshëm zgjedhor.

Sipas tij, në degët më të mëdha, sipas kërkesave, mund të ngrihen edhe më shumë se një qendër votimi, me qëllim garantimin e pjesëmarrjes sa më të gjerë të anëtarësisë.

Kaso u shpreh se në total, 77 degë të Partisë Demokratike në të gjithë vendin do të përfshihen në procesin e së shtunës, të cilin ai e cilësoi si një ushtrim të demokracisë së drejtpërdrejtë dhe të brendshme partiake.

Ai theksoi gjithashtu se, sipas tij, Partia Demokratike ka zhvilluar disa procese të hapura zgjedhore që nga ngritja e Komisionit të Rithemelimit, duke i krahasuar me mënyrën e funksionimit të forcave të tjera politike.

Në përfundim, Kaso u bëri thirrje të gjithë anëtarëve të Partisë Demokratike të marrin pjesë në votim dhe të ushtrojnë të drejtën e tyre në referendumin e 23 majit.