Përmbytjet, AP pranë familjes së 38-vjeçares që humbi jetën në Pogradec

Avokati i Popullit është pranë 38-vjeçares që humbi jetën në Pogradec si pasojë e daljes nga shtrati të lumit Vërdov, teksa ka kërkuar bashkëpunim me autoritet lokale dhe qendrore për të tejkaluar këtë situatë problematike.

Në një deklaratë për mediat, Institucioni i Avokatit të Popullit me hidhërim të thellë mësoi nga media humbjen e jetës së gruas 38 vjeçare në fshatin Vërdovë të Pogradecit si pasojë e kushteve të rënduara atmosferike. Me këtë rast Avokati i Popullit u shpreh ngushëllimet familjarëve të viktimës.

 Gjithashtu Avokati i Popullit u bën thirrje të gjithë qytetarëve që të ndjekin këshillat dhe udhëzimet e dhëna nga autoritetet në zonat më problematike në mënyrë që të evitohen humbjet e jetëve. Avokati i Popullit nga ana tjetër fton autoritetet të vazhdojnë të jenë në gatishmëri të plotë për çdo rast emergjence jo vetëm për qytetarët por edhe për gjënë e gjallë që vazhdon të jetë e rrezikuar në zonat e përmbytura.

Ne nxisim gjithashtu të gjithë qytetarët të jenë solidarë me njëri- tjetrin dhe ju bëjmë thirrje organizatave te shoqërisë civile te kontribuojnë me mundësitë qe ata disponojnë për lehtësimin e gjendjes se krijuar. Bashkëpunimi dhe solidariteti ndihmojnë menaxhimin me sa më pak dëme të situatës së rëndë të krijuarm thote ai ne deklarate.