Përmbytjet-Kyqi i Kuq Shqiptar ndihma ushqimore për banorët

Kryqi i Kuq Shqiptar (KKSH) ka ndërmarrë një operacion ndihme për 2.000 familjet më të prekura nga fatkeqësia natyrore e përmbytjeve në qarqet e Vlorës, Fierit, Beratit, Elbasanit dhe Gjirokastrës.

Përmes një njoftimi për shtyp, KKSH bën të situr se, operacioni i ndihmës konsiston në shpërndarjen e artikujve bazë ushqimorë e jo ushqimorë për një muaj, siguruar nga stoku rezervë për raste katastrofash i shoqatës dhe nga mbështetja e Federatës Ndërkombëtare të Kryqit të Kuq dhe të Gjysmëhënës së Kuqe, në përgjigje të kërkesës për ndihmë të lëshuar për këtë rast nga Kryqi i Kuq Shqiptar.

Paketa e ndihmës për një familje me ushqime dhe materiale joushqimore sipas standardit të Lëvizjes ndërkombëtare të Kryqit të Kuq përmban: miell 30 kg, vaj 4 litra, sheqer 4 kg, oriz 4 kg, fasule 4 kg, makarona 4 kg, kripë 0.5 kg, batanije 5 copë dhe 1 kit higjenik.

Ndërhyrja e KKSH-së do të bëhet në bashkëpunim dhe koordinim të ngushtë me strukturat e pushtetit qendror dhe vendor, veçanërisht me Komisionin Ndërministror, Drejtorinë e Emergjencave Civile, Komisionin e Menaxhimit të Emergjencës të këtyre qarqeve. Nga ky bashkëpunim do të përcaktohen edhe zonat ku KKSH do të operojë për shpërndarjen e ndihmave, bën të ditur KKSH-ja.