Përplasja Berisha-Braçe, kryebashkiaku i Divjakës: Akuzat ndaj meje, të pavërteta

Ish-kryeministri Sali Berisha u përplas në seancën parlamentare të së enjtes me deputetin socialist, Erion Braçe, pas akuzave që hodhi për kryetarin e Bashkisë së Divjakës, Fredi Kokoneshi, se ka vjedhur 1 milion dollarë në tenderin e bërë për rrugën Mertish-3 Urat dhe si të lidhur me prostitucionin.
Sali Berisha, deputet i PD-së: “Alba Construction”, që më thonë është një kompani serioze, ka ofruar për të fituar tenderin 212 milionë lekë, tenderi i jepet kompanisë tjetër “Salillari”, se iu ka ofruar nga 1 milion atyre që janë aty me radhë, kryetarit bashkisë, deputetë, etj.
Erion Braçe, deputet i PS-së: Për turp të Zotit, po ta përsëris edhe njëherë tjetër. Çohesh këtu dhe thua “kam të dhëna të pakonfirmuara, të pavërtetuara, por ai është trafikant femrash”. Po mirë, çfarë je ti? A je prind ti? A ke fëmijë ti në shtëpi? Unë nuk e di se si ndjehen fëmijët tuaj kur më dëgjojnë mua që të përmend vrasjet në mes të bulevardit, atyre mbase ju vjen mirë.
Por, pas këtyre akuzave, ka reaguar kryetari i Bashkisë së Divjakës, Fredi Kokoneshi, që e cilësoi shpifje akuzën dhe u tregua i gatshëm për të bërë transparencën e të gjitha dokumenteve për këtë çështje.
“Oferta e paraqitur nga bashkimi i operatorëve ekonomikë “Alba Construction” rezulton anomalisht e ulët në bazë të llogaritjeve të bëra nga komisioni i vlerësimit të ofertave”, deklaroi kreu i Bashkisë Divjakë, Fredi Kokoneshi.