Policia e Shtetit në gatishmëri të përforcuar pas sulmeve në Paris

Policia e Shtetit ka kaluar në gatishmëri të përforcuar pas sulmeve në Paris të Francës, mbrëmjen e të premtes.

Burime nga policia bëjnë të ditur se ka gatishmëri të përforcuar në pikat kufitare, si dhe e gjithë drejtoria e antiterrorit. Shërbime policore shtesë janë vendosur në objekte që konsiderohen me risk, siç janë ambientet publike me frekuentim të lartë, ambasadat apo rezidencat, dhe akset kryesore rrugore.

Gjithashtu, është hartuar një plan i detajuar për evidentimin dhe mbikqyrjen e gjithë elementëve të dyshuar që mund të kenë tendenca për akte terrori.

Gjithashtu Policia e Shtetit ka rritur intensitetin e shkëmbimit të informacionit me partnerët ndërkombëtarë për persona të caktuar që mund të shfaqin tendenca të akteve terroriste.

Mësohet se për ngjarjet në Paris në gatishmëri kanë kaluar dhe shërbimet inteligjente shqiptare. Mësohet se presidenti Bujar Nishani ka pritur në takim kreun e SHISH, Visho Ajazi Lika.