Policia “kujtohet” të bëjë detyrën, merr në mbrojtje Xhisiela Malokun

Policia ka marrë në mbrojtje Xhisiela Malokun një ditë pas arrestimit të Rexhep Rrajës, i cili u prangos nga autoritetet në akuzën e përndjekjes.

Kujtojmë se javën që lamë pas rastin e ka denoncuar një ish nënkomisar i policisë. Emiljano Nuhu është shprehur gjatë denoncimit të tij se ai është kërcënuar me një pistoletë në kokë nga ana e vëllait të deputetit Rrahman Rraja, në ambientet e stacionit të policisë në Fushë- Krujë, menjëherë sapo ai mori në shqyrtim dosjen dhe denoncimin e vajzës mbi djalin e deputetit socialist.

Ngjarja më tutje mori përmasa politike dhe deri më tani përplasjet mes opozitës dhe maxhorancës kanë prodhuar jo vetëm akuza por edhe kallëzime penale, siç ishte dhe ai i deputetit Taulant Balla. Balla sipas denoncuesit Emiljano Nuhu, ishte prezent në momentin kur në kokën e tij është drejtuar një pistoletë nga ana e vëllait të Rrahman Rrajës.

Vetëm ditën e djeshme policia ka vënë në pranga Rexhep Rrajën, nën akuzën e përndjekjes dhe jo të dhunës, pavarësisht se sipas ekspertizës së kryer mbi trupin e të resë, rezulton se ajo është dhunuar fizikisht./