Policia shpall në kërkim ish-drejtorin e Lojërave të Fatit, Besnik Çobaj
Policia e Tiranës ka njoftuar se ka shpallur në kërkim ish-drejtorin e Lojërave të Fatit, Besnik Çobaj dhe Nikolin Gjekën, ish-drejtorin e Drejtorisë Operacionale në këtë njësi.
Prej katër ditësh, Gjykata e Tiranës, me kërkesë të Prokurorisë, ka caktuar masën “arrest me burg” për Çobajn dhe disa ish-zyrtarë të tjerë.
Për Çobajn, prokuroria ka lëshuar një urdhër arresti pas kallëzimit penal të bërë nga Ministria e Financave, e cila e ka paditur për shpërdorim detyre dhe falsifikim dokumentesh.
Prokuroria prej muajsh po hetonte, ku dyshohet se personat në fjalë i kanë sjell shtetit një dëm prej rreth 250 milionë lekësh.
Por nga ana e saj, Policia e Shtetit ka njoftuar prokurorinë se nuk ka arritur t’i gjejë dy personat në fjalë për t’i arrestuar. Policia ka bërë të ditur po ashtu, se sistemi TIMS, tregon se Çobaj dhe Gjeka nuk kanë dalë jashtë Shqipërisë. Sipas policisë, ata të dy po i fshihen drejtësisë.
