Politico: Shqetësim në BE për varësinë e Ballkanit Perëndimor nga gazi amerikan

Përpjekjet e kompanive amerikane të energjisë për të rritur ndikimin e tyre në Ballkanin Perëndimor po shkaktojnë shqetësim në Bashkimin Evropian se rajoni mund të bëhet i varur nga gazi fosil amerikan, në momentin kur synon të arrijë objektivat e energjisë së pastër për t’u integruar më shumë në BE, shkruan portali i Brukselit Politico.

Shqipëria, Kosova dhe Bosnje-Hercegovina kanë shprehur interes për blerjen e sasive të mëdha të gazit natyror të lëngëzuar (LNG) nga SHBA-ja ose për ndërtimin e infrastrukturës që do të mundësonte importin e tij, duke argumentuar se u duhet gazi si lëndë djegëse tranzitore teksa pakësojnë importin e energjentëve rusë dhe konsumin e qymyrit dhe kalojnë te burimet e ripërtëritshme — elemente kyçe të rrugës së tyre drejt anëtarësimit në BE.

Zyrtarët e BE-së, megjithatë, e vënë në dyshim nevojshmërinë apo dëshirueshmërinë e këtyre projekteve, duke pasur parasysh se në këto vende aktualisht nuk ka kërkesë për gaz ose ajo është e vogël. Përpjekjet për t’i përmbytur këto tregje me gaz, shkruan Politico, mbartin rrezikun e një varësie më të madhe afatgjatë nga importi i gazit nga jashtë. Objektivi i BE-së është që emetimet e gazeve serë të arrijnë zero deri në vitin 2050 dhe që përdorimi i burimeve të ripërtëritshme të rritet; anëtarët e rinj duhet të përshtaten me këtë, por zyrtarët e BE-së tremben se rritja e importit të gazit mund të rrezikojë këto objektiva.

Politico kujton gjithashtu se Shqipëria ka nënshkruar me kompaninë amerikane Venture Global një kontratë 20-vjeçare për furnizimin me gaz natyror të lëngëzuar, në kuadër të bashkëpunimit më të gjerë me SHBA-në dhe Greqinë, dhe se Serbia e Maqedonia e Veriut planifikojnë gjithashtu të importojnë LNG amerikan përmes interkoneksionit me Greqinë. Një zëdhënës i Departamentit të Energjisë së SHBA-së tha se bashkëpunimi “do të kontribuojë në stabilitetin në rajon, do të ulë çmimet e energjisë dhe do të nxisë tregtinë dhe prosperitetin”, dhe se këto projekte do t’i ndihmojnë Shqipërinë e BiH “të pakësojnë varësinë nga gazi rus”, duke e zëvendësuar me gazin natyror të lëngëzuar amerikan. Pavarësisht reagimeve negative të zyrtarëve të BE-së, përfaqësuesit e vendeve të Ballkanit Perëndimor që folën në takimin e Vjenës theksuan se marrëveshjet me SHBA-në janë të domosdoshme për t’u përshtatur me tranzicionin e gjelbër të BE-së, i cili do të kërkojë sasi të konsiderueshme gazi për të siguruar furnizimin e besueshëm “bazë” me energji elektrike kur burimet më të paqëndrueshme janë jashtë funksionit dhe gjatë procesit të largimit gradual nga qymyri.

Burimi: Serbian News Media