Obradoviç në Oslo: Vuçiç duhet të tregojë kush e drejtoi projektin e hekurudhës

Vladimir Obradoviç, anëtar i Komisionit Hetimor për rënien e tendës në stacionin hekurudhor të Novi Sadit, prezantoi në Oslo gjetjet e një kërkimi mbi menaxhimin dhe korrupsionin në rikonstruksionin e linjës hekurudhore Novi Sad–Kelebija. Kërkimi u paraqit në Concept Symposium 2026, një takim ndërkombëtar kushtuar menaxhimit të projekteve të mëdha publike, ku morën pjesë përfaqësues të institucioneve financiare dhe shtetërore ndërkombëtare, si dhe studiues nga universitete evropiane.

Sipas Obradoviçit, dokumentacioni — pjesërisht publik dhe pjesërisht i dorëzuar drejtpërdrejt autorëve — ka treguar përfshirjen e njerëzve nga Sekretariati i Përgjithshëm i Presidentit të Republikës në koordinimin e projektit, ndonëse Presidenca nuk ishte formalisht kompetente. “Aleksandar Vuçiç duhet t’i përgjigjet një pyetjeje të thjeshtë: kush dhe me çfarë autorizimi nga kabineti i tij ka koordinuar institucionet shtetërore dhe pjesëmarrësit në projektin e hekurudhës? Nuk mund të kesh pushtet politik mbi projektin, të ndikosh në afate dhe prioritete, e pastaj, kur vjen koha e përgjegjësisë, të pretendosh se nuk ke asgjë me projektin”, deklaroi Obradoviç.

Ai shtoi se informacionet për gjendjen e projektit dhe problemet kishin arritur edhe te kryetari i atëhershëm i Novi Sadit, Millosh Vuçevic, dhe te anëtarja e atëhershme e Këshillit të Qytetit, Adrijana Mesaroviç. Sipas tij, është një pyetje legjitime pse njerëzit, emrat e të cilëve dalin në dokumentacion, sot ndodhen në listën zgjedhore të SNS-së krah Vuçiçit.

Obradoviç theksoi se Komisioni Hetimor, në raportin e tij përfundimtar, ka konstatuar se ekzistojnë baza të dyshimit se shembja e tendës është pasojë e veprimit të një grupi kriminal të organizuar dhe se ekzistojnë baza të dyshimit se në krye të tij ndodhet presidenti i Republikës, Aleksandar Vuçiç. “Ky është një konstatim serioz, i bazuar në dokumentacion të gjerë, dhe prokuroria duhet të hetojë të gjithë zinxhirin”, porositi ai.

Ai dhe kolegu i tij Ognjen Radonjiç theksuan se Serbisë nuk i mjafton vetëm përcaktimi i përgjegjësisë individuale për rënien e tendës; është e domosdoshme të hetohet se si funksionoi i gjithë sistemi i vendimmarrjes dhe përgjegjësisë në projekt. Rasti është prezantuar më herët edhe në Parlamentin Evropian në Strasburg dhe në Kongresin Botëror në Hiroshima.

Burimi: Serbian News Media