Porti, shkarkohen 5 anije me mallra, priten edhe 7 të tjera

Në kalatat e portit të Durrësit po shkarkohen 5 anije tregtare me mallra të ndryshme, ndërsa sot  paradite ka përfunduar edhe shkarkimi i anijes “Kriylon” me 4050 ton grurë.

Burime zyrtare nga dispeceria e këtij porti, bëjnë me dije se dy anije po shkarkojnë afro 6500 ton grurë. Në kalatat 1, 5 dhe 6 vazhdon shkarkimi i tre anijeve, të cilat kanë sjellë përkatësisht 4000 ton cimento, 773 ton mallra ushqimore dhe 78 copë kontejnerë.

Sipas burimeve, në radën portuale ndodhen 3 anije, një prej të cilave do të ngarkojë 5800 ton çimento të prodhuar në vendin tonë, ndërsa dy të tjerat kanë sjellë 309 kontejnerë me mallra të ndryshme.

Në portin detar pritet të ankorohen këto ditë edhe katër anije të tjera tregtare, tre nga të cilat me kontejnerë dhe me grurë, ndërsa një tjetër do të ngarkohet me 5600 ton prokate celiku, të prodhuara në Elbasan