“Askush të mos guxojë të përdhosë Gjykatën Kushtetuese. Parlamenti, me një dekret shpërndahet, qeveria me mocion mosbesimi rrëzohet, presidenti me një impeachment nga një parlament legjitim, jo nga ky, përsëri shkarkohet nga Gjykata Kushtetuese” paralajmëroi ai.
“Nëse dikush mendon se angazhimet e mia kanë qenë ceremoniale do t’i bëj të qartë se kjo është Kushtetutë që mbron popullin dhe do të jetë detyrë e popullit dhe e Presidentit t’i tregojnë vendin kësaj bande uzurpatore” rriti tonet presidenti Meta.
“Secili të zbatojë kompetencat e veta, veprimet do të vazhdojnë të jenë nga presidenti institucionale, dhe në momentin e duhur presidenti do t’i drejtohet popullit dhe gjithë botës për të mbrojtur demokracinë që është dhunuar në mënyrën më barbare sidomos këto 2 vite kur është lënë qëllimisht pa Gjykatë Kushtetuese” tha zoti Meta.
Presidenti Meta paralajmëron shpërndarjen e parlamentit dhe mbajtjen e një referendumi
Presidenti shqiptar Ilir Meta ka rritur ndjeshëm tonet e tij kundër maxhorancës duke paralajmëruar se do të shpërndajë parlamentin dhe t’i drejtohet popullit për një referendum. Deklaratat e tij erdhën ndërsa parlamenti është mbledhur në seancë të jashtëzakonshme për rezolutën kundër Metës, të cilin maxhoranca e akuzon se me disa dekrete të tij ka krijuar ngërç në Gjykatën Kushtetuese. “Nuk ka institucion më të rëndësishëm në Shqipëri se Kushtetuta e cila ka vetëm një garant të pacenueshëm që është Gjykata Kushtetuese. Përpjekjet për të dhunuar Kushtetutën, në përpjekje për të kapur përfundimisht gjithë sistemin e drejtësisë në Shqipëri, me kapjen e Gjykatës Kushtetuese, janë të dështuara, janë të vdekura” tha zoti Meta.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.