Pr/ligji për Gjykatën Administrative, Naço: Risi për sistemin e drejtësisë

Pr/ligji “Për organizimin dhe funksionimin e gjykatave administrative” është një risi për sistemin e drejtësisë Shqiptare, tha sot Ministri i Drejtësisë Nasip Naço, nga foltorja e Kuvendit në çeljen e diskutimeve për projekt-ligjin në fjalë.

Ministri i Drejtësisë bëri të ditur se “Pr/ligji ka në fokus rritjen e efikasitetit të punës gjatë ushtrimit të detyrës së gjyqtarëve në gjykatat administrative, si dhe përmirësimin e cilësisë së vendimarrjes dhe respektimit të afateve ligjore për zbardhjen e vendimeve”.

Sipas kreut të drejtësisë, paraqet një risi për sistemin e drejtësisë shqiptare. “Risi e këtij projektligji është parashikimi i numrit të ndihmësave ligjorë, në varësi të ngarkesës së punës të çdo gjykate administrative, që tashmë do të jetë jo më pak se 50 % të numrit të gjyqtarëve. Një risi tjetër është përcaktimi i procedurave të qarta dhe transparente, që procesi i përzgjedhjes, emërimit, lirimit apo shkarkimit nga puna të ndihmësit ligjor t’i nënshtrohet një procedure konkurrimi transparente, bazuar në meritë.”, theksoi Naço.

“Gjithashtu, tha Naço, nëpërmjet këtij projektligji arrihet që një kategori e caktuar çështjesh në Gjykatën e Lartë të shqyrtohen në mënyrë më racionale, duke ulur numrin e anëtarëve përbërës të kolegjeve shqyrtuese nga 5 në 3, sipas kritereve të vendosura në ligj”.

Në fund, Kreu i Drejtësisë Shqiptare bëri të ditur se nëpërmjet këtyre ndryshimeve i jepet zgjidhje edhe administrimit të çështjeve në Gjykatën e Lartë, nëpërmjet disiplinimit të rregullave të qarta për njoftimin e palëve ndërgjyqëse