Procesi i integrimit, Rama: Pas pak ditësh do takohem me kancelarin gjerman, Friedrich Merz

Kryeministri Edi Rama ka bërë të ditur se brenda pak ditëve do të zhvillojë një takim zyrtar me kancelarin e Gjermanisë, Friedrich Merz.

Duke folur në takimin kremtues me rastin e 35-vjetorit të themelimit të Partisë Socialiste të Durrësit. Rama theksoi se “pas disa ditësh do t’ju çoj si përshëndetje një informacion të detajuar nga takimi që do të kem me kancelarin e Gjermanisë”, deklaroi Rama.

Kryeministri u ndal edhe te prania e Gjermanisë në konferencën ndërqeveritare të nesërme në Bruksel, duke ironizuar kritikat e opozitës ndaj marrëdhënieve me Gjermaninë.

“E para, nesër në Bruksel janë të gjithë, është edhe Gjermania. E dyta, mbas disa ditësh do t’ju çoj si përshëndetje një informacion të detajuar nga takimi që do të kem me kancelarin e Gjermanisë. Dhe do ma falni se do ma falni vanitetin, po kjo është një pjesë që edhe më argëton pak se dhe duhet të argëtohemi ndonjëherë argëton pak me ta, sepse i bien grepit po njësoj, po njësoj edhe nuk ka nevojë për karrem fare. Edhe unë kam shumë qejf, të them të drejtën, kur i shoh që shkojnë te grepi, ba ba edhe thonë e këputëm dhe pastaj e gjejnë veten në grepin”, tha Rama.

Rama e cilësoi takimin si pjesë të rrugëtimit europian të Shqipërisë, duke nënvizuar rolin kyç të Gjermanisë në procesin e zgjerimit të Bashkimit Europian.

Ai e quajti një moment pozitiv që tregon se Shqipëria është në një fazë të re të marrëdhënieve me partnerët evropiane.