Prokuroria e Lartë në Beograd apel para zgjedhjeve: Respektoni Kushtetutën dhe ligjet, kush prish rendin do të procedohet

Prokuroria e Lartë Publike në Beograd u bëri thirrje të premten qytetarëve, institucioneve përgjegjëse për zhvillimin e veprimeve zgjedhore dhe organeve shtetërore që në periudhën në vijim t’i përmbahen rreptësisht Kushtetutës dhe ligjeve të Republikës së Serbisë, në mënyrë që të gjitha veprimet zgjedhore lidhur me zgjedhjet e parakohshme parlamentare të zhvillohen në përputhje me to, siç njofton Blic.

Sipas raportimit të Kurir, prokuroria paralajmëroi se do të procedohet kushdo që përpiqet të prishë rendin dhe qetësinë publike. Shërbimet kompetente, thuhet në apel, do të kujdesen që i gjithë procesi zgjedhor të kalojë i qetë dhe në një atmosferë demokratike, ndërsa ndaj parregullsive të mundshme do të reagohet në afatin më të shkurtër të mundshëm.

Apeli u bë gjatë heshtjes zgjedhore, e cila ka nisur në mesnatë dhe do të zgjasë deri në mbylljen e qendrave të votimit të dielën, më 25 tetor, në orën 20:00. Të drejtë vote kanë 6.450.523 qytetarë, ndërsa në garë për 250 vendet e Kuvendit të Serbisë janë 18 lista zgjedhore.

Në gatishmëri për ditën e zgjedhjeve është edhe Avokati i Popullit, i cili njoftoi se do të organizojë detyra 24-orëshe duke filluar nga 25 tetori, në mënyrë që qytetarët të mund të raportojnë shkelje të mundshme të të drejtave gjatë procesit zgjedhor dhe atij paszgjedhor.

Thirrja e prokurorisë vjen pas arrestimeve të ditëve të fundit të disa personave të dyshuar se planifikonin dhunë në ditën e zgjedhjeve dhe pas deklaratës së drejtorit të policisë, Dragan Vasiljeviq, se policia po zbaton masa që procesi i 25 tetorit të kalojë plotësisht i sigurt.