Prokuroria nis hetimet për videoskandalin e menaxherit Çaushi

Prokuria e Tiranës zbret në fushë pas publikimit të video-skandalit nga emisioni investigativ Fiks Fare, ku menaxheri i futbollistëve Drini Çaushi nëpërmjet një bisede telefonike i kërkonte lojtarit të Partizanit, Emiliano Vila që të toleronte ndeshjen me Kukësin.

E gjithë videoja e regjistuar, tashmë ka rënë në duart e policisë, që ia ka referuar materialin kallëzues Prokurorisë së Kryeqytetit për veprime të metejshme hetimore ndaj Drini Caushit, i cili akuzohet se i ka kërkuar Vilës të kryejë veprime në kundërshtim me garën sportive, parashikuar nga neni 197 i Kodit Penal.

Kjo lëvizje e organeve ligjzbatuese erdhi menjëherë pas reagimit të klubit të Partizanit, Federatës Shqiptare të Futbollit, por edhe nga klubi i Kukësit për hetime të mëtejshme, në mënyrë që t’i shkohet deri në fund kësaj cështjeje, për të nxjerrë përgjegjësitë dhe zbardhur deri në detaje të vërtetën.

Nga veprimet e mëtejshme hetimore do të mësohet nëse Çaushi ka vepruar individualisht, apo i është kërkuar të ndërhyjë nga persona të tjerë për tolerimin e ndeshjes nga futbollistët e Partizanit.

Klubi i Kukësit është distancuar menjehërë nga kjo ngjarje, duke theksuar se nuk ka asnjë lidhje me personin në fjalë, sikurse FSHF ka sqaruar se Drini Çaushi nuk figuron të jetë pjesë e një asnjë skuadre apo shoqate në futbollin shqiptar.