“Protestat shenjë demokracie”, ambasadori i OSBE në RTSH Korça: Sfidë mbetet gjuha e ashpër politike

“Protestat qytetare janë një element normal i demokracisë, ndërsa dialogu mbetet sfida kryesore e politikës shqiptare”. Kështu u shpreh ambasadori i Prezencës së OSBE-së në Shqipëri, Michel Tarran, i cili vlerësoi faktin se protestat në vend zhvillohen kryesisht në mënyrë paqësore dhe me respekt për të drejtën e qytetarëve për t’u shprehur.

“Protestat janë një aspekt normal i jetës demokratike dhe gëzohem që Shqipëria u bë tani një vend, ku protesta të tilla mund të organizohen edhe në mënyrë shumë qytetare, në mënyrë shumë paqësore. Ka patur disa incidente, por në përgjithësi nëse shikon pas më shumë se një muaj nuk ka patur incident të rëndësishëm”, u shpreh ambasadori i Prezencës së OSBE-së në Shqipëri, Michel Tarran.

Duke komentuar klimën politike në vend, ambasadori u ndal edhe te polarizimi politik, duke theksuar se pluralizmi është një vlerë e demokracisë, por nënvizoi se debatit politik i mungon dialogu konstruktiv dhe një komunikim më i respektueshëm mes palëve.

“Fakti që ekzistojnë polet, dy ose tre ose më shumë pole në fushë politike është diçka normale. Është tamam karakteristika e vendeve demokratike. Fatkeqësisht duhet të thoni që dialogu në politikë në Shqipëri nuk është në nivelin i duhur”, tha ambasadori Tarran.

Këto deklarata ambasadori i Prezencës së OSBE-së në Shqipëri, Michel Tarran, i bëri gjatë vizitës së tij në RTSH Korça, ku zhvilloi takime me drejtuesit dhe stafin e këtij institucioni mediatik.