Punësimi real, Rama: Shqipëria llogarit 174 mijë punonjës të siguruar, krahasuar me 2013
Kryeministri Edi Rama deklaroi sot se punësimi real është një sfidë për çdo qeveri në Europë, por Shqipëria ka hedhur hapa të rëndësishëm në drejtimin e duhur, pasi janë shtuar 174 mijë punonjës (krahasuar me vitin 2013) të siguruar që paguajn kontributet.
Kryeministri Rama në nje status te tij ne Facebook, mëngjesin e së enjtës, shprehet se “Punësimi real është sfida e jashtëzakonshme e çdo qeverie sot në Europë dhe në rajonin tonë kjo është një sfidë edhe më e vështirë. Por s’ka asnjë dyshim se Shqipëria ka hedhur hapa të rëndësishëm në drejtimin e duhur duke ndërmarrë reforma të thella për të dalë nga një prapambetje e madhe”.
Rama thekson se “Reformat duan durim dhe kohën e tyre për të dhënë të gjitha frutet e dëshiruara, ndërkohë që në librin e llogarive të shtetit janë shtuar 174 mijë punonjës (krahasuar me vitin 2013), të siguruar e që paguajnë kontributet e tyre për shtetin sipas të ardhurave. Edhe numri i bizneseve që krijojnë punësim dhe vetëpunësim, është rritur ndjeshëm”.
“Por duhet të vazhdojmë me vendosmëri përpjekjet e nisura sepse shumë më tepër mbetet për t’u bërë. #DrejtimiiDuhur #Rilindje”, shkruan Rama, duke postuar edhe një video të një biznesi.
