Putin urdhëron tërheqjen e trupave ruse nga kufiri me Ukrainën

Presidenti rus, Vladimir Putin urdhëroi ministrin e Mbrojtjes të tërhiqte trupat ruse të vendosura në kufirin me Ukrainën që prej kësaj vere për manovra, njoftoi Kremlini para diskutimeve për armëpushimin e brishtë në Lindje të këtij vendi.

“Presidenti ka ngarkuar ministrin e Mbrojtjes të fillojë rikthimin e trupave në bazat e tyre të përhershme”, njoftoi Kremlini dje në mbrëmje duke iu referuar 17 600 trupave të përfshirë në manovra që prej verës në rajonin e Rostovit, në jug të Rusisë.

”Ministri i Mbrojtjes, Serguei Shoigu kishte marrë urdhër presidencial pasi kishte raportuar se trajnimi në kampet e distriktit ushtarak kishte përfunduar”, vijoi Kremlini.

Vladimir Putin do të takojë presidentin ukrainas, Petro Poroshenko në kuadër të një samiti që do të zhvillohet të premten në Milano ku do të marrin pjesë zyrtarë të lartë evropianë si dhe kancelarja gjermane, Angela Merkel dhe kryeministrat italian, Matteo Renzi dhe britanik, David Cameron