Qeveria miraton Kartën për hapjen e të dhënave

Ministri për Integrime Evropiane, Bekim Çollaku, bën të ditur se qeveria kosovare miratoi sot Kartën për hapjen e të dhënave, që u garanton individëve, mediave, shoqërisë civile e bizneseve qasje në shënimet qeveritare.

“Sot prezantova vendimin për miratimin e Kartës për hapjen e të dhënave, të cilën e miratoi Qeveria e Republikës së Kosovës. Më vjen jashtëzakonisht mirë që në këtë aspekt, Kosova po zë trendet e fundit evropiane dhe botërore”, thekson Çollaku në rrjetin social Facebook.

Sipas tij, përveç faktit që ky hap është shumë i rëndësishëm drejt rritjes së transparencës dhe llogaridhënies, nga hapja e të dhënave përfitojnë institucionet publike dhe private dhe përfundimisht çdo qytetar.

“Qasja në shënimet e qeverisë mund të fuqizojë individët, mediet, shoqërinë civile dhe bizneset, në mënyrë që të ketë rezultate më të mira në shërbimet publike dhe qeverisjen e mirë. Karta të cilën kemi miratuar është në pajtim të plotë me parimet dhe praktikat më të mira e të dhënave të hapura”, përfundon Çollaku.