QKSS: Forca e Sigurisë e Kosovës është ushtri

Forca e Sigurisë e Kosovës është ushtri, thekson sot në një analizë Qendra Kosovare për Studime të Sigurisë (QKSS), e cila sjell edhe argumentet juridike.

Analiza e dërguar thekson se kufizimet ligjore të vendosura lidhur me armatimin, numrin e pjesëtarëve si dhe me kompetencat e Forcës së Sigurisë të Kosovës (FSK) e bëjnë që ajo në publik të mos konsiderohet si ushtri.

Në debatin publik është diskutuar mundësia e ndryshimit të Kushtetutës për të shndërruar FSK në ushtri. Në këtë mendim juridik do të argumentohet që sipas Kushtetutës së Republikës së Kosovës, FSK është forcë ushtarake dhe nuk ka nevojë që të ndryshohet Kushtetuta për të eliminuar kufizimet aktuale që e pengojnë atë të jetë forcë e plotë ushtarake. Të gjitha kufizimet aktuale mund të eliminohen përmes ndryshimit të legjislacionit përkatës brenda dispozitave ekzistuese të Kushtetutës.

Ndryshimi i Kushtetutës do të kërkonte miratimin e dy të tretave (2/3) e të gjithë deputetëve të Kuvendit të Kosovës, përfshirë dy të tretat (2/3) e të gjithë deputetëve të Kuvendit që mbajnë vende të rezervuara ose të garantuara për përfaqësuesit e komuniteteve që nuk janë shumicë në Republikën e Kosovës (neni 144.2 i Kushtetutës). Në anën tjetër, pasi që legjislacioni për FSK nuk paraqet legjislacion me interes vital (neni 81 i Kushtetutës), ndryshimi i legjislacionit për FSK do të mund të miratohej nga Kuvendi i Kosovës vetëm me shumicën e votave të deputetëve të pranishëm dhe që votojnë (neni 80.1 i Kushtetutës).

Qendra Kosovare për Studime të Sigurisë ka publikuar raportin e përpiluar nga juristi Dr. Robert Muharremi i cili ngërthen argumente juridike lidhur me mundësinë e ndryshimit të mandatit të FSK-së: “Forca e Sigurisë e Kosovës është ushtri – Argumentet Juridike”.

Pikëpamjet e shprehura në këtë studim janë të autorit dhe nuk reflektojnë domosdoshmërisht pikëpamjet e Qendrës Kosovare për Studime të Sigurisë dhe partnerëve, theksohet në njoftim.