“Queen Elizabeth” rikthehet në Sarandë

Anija trans-oqeanike “Queen Elizabeth”: bëri “prekjen” e dytë të brigjeve të Sarandës, me rreth 2000 turistë elitarë në bord. Me rikthimin e saj, u shtua edhe një ditë tjetër  e veçantë për turizmin e kruazierave të Sarandës. Kruaziera trans-oqeanike “Queen Elizabeth”, është 16-katëshe, me gjatësi 294 m dhe gjerësi 32.3 m.

Turistët, kryesisht amerikanë, që zbritën në terminal nga “Queen Elizabeth” kanë shëtitur të lirë nëpër qytet, disa kanë zgjedhur të vizitojnë qytetin antik të Butrintit. Qyteti i Sarandës dhe biznesi është përgatitur për ta përcjellë këtë ardhje si një event turistik. Për këtë janë marrë masa që qyteti të jetë në performancën e vet më të mirë, që asetet turistike të jenë të disponueshme për t’u vizituar. Zyrat e informacionit turistik kanë ofruar shërbimin e tyre dhe njësitë e suvenireve kanë funksionuar si në ditë vere.
Anija “Queen Elizabeth” është kruaziere luksoze. Në brendësi të saj ajo ruan “old fashion” të së famshmes “Queen Elizabeth 1″, e prezantuar  më 1938 dhe që sherbeu deri më 1973, kur një zjarr misterioz e shkatërroi pjesërisht. Rikthimi i saj është një ogur i mirë për turizmin shqiptarë.