Rama: Atë që i kanë bërë pronës gjykatat e këtij vendi nuk e ka bërë asnjë pushtues
Kryeministri Edi Rama tha se Reforma në Drejtësi është e lidhur me reformën e pronës.
Në një aktivitet të zhvilluar nga Agjencia e Trajtimit të Pronave, kreu i ekzekutivit tha se ajo që gjykata i ka bërë pronës nuk i ka bërë asnjë pushtues vendit tonë.
“Nëse ka një temë që lidhet drejtpërdrejt me temën e reformës në drejtësi është reforma e pronës. Reforma në drejtësi perceptohet si instrument për të goditur zyrtarët e lartë që përzihen në kanalet e korrupsionit, por nëse reforma në drejtësi i duhet këtij vendi dëshpërimisht.
A-ja është për ti dhënë fund përmes një drejtësie të drejtë padrejtësisë së kthyer në sistem në tërësi dhe në veçanti padrejtësisë së kthyer në sistem kur vjen puna tek e drejta e pronës.
Çka i kanë bërë pronës gjykatat e këtij vendi nuk ja ka bërë asnjëherë në shekuj asnjë pushtues i këtij vendi dhe çfarë kanë arritur ti bëjnë gjykatësit e korruptuar kur kanë gjykuar pronën nuk ka arritur ti bëjë asnjë armik dhe nuk do t’ja bënte asnjë armik sado i betuar”, tha Rama.
Kryeministri theksoi se kjo reformë ka një afat.
“Kjo reformë bën të qartë se më në fund kemi një afat për ti mbyllur të gjitha çështjet e pronës dhe për ti dhënë përgjigje atyre që me të drejtën e zotit dhe të kushtetutës pretendojnë kompensim të pronës së tyre. Një proces që ishte pa afat, pa rrugë dalje pa shpresë, sot ka afat, ka rrugëdalje, ka shpresë. Mbyllet procesi i vlerësimit financiar i të gjitha vendimeve të dhëna për këto 22 vjet për kthim apo kompensim. Në 3 vjet do të përfundojë shqyrtimi i kërkesave të patrajtuara që prej 20 e kusur vitesh i kanë lënë njerëzit në pritje”, tha Rama.
