Rama donacion për Obamën? Fajtor shqiptari, ndërmjetësoi foton e 2012-s

Në Shtetet e Bashkuara të Amerikës është e ndaluar që kontribute financiare nga jashtë vendit të përdoren në zgjedhjet presidenciale për mbështetjen e ndonjë kandidati.

Por këtë veprim pranon se e ka bërë gjatë grumbullimit të fondeve për Barack Obamën në 2012-n Bilal Shehu, një shofer limuzine në Nju Xhersi, shtetas amerikan me origjinë shqiptare.

Ai i pohoi gjykatës gjetjet e prokurorisë se në tetor 2012 kishte marrë nga jashtë një transfertë prej 80 mijë dollarësh për blerjen e dy biletave pë familjen e tij për një mbledhje fondesh të presidentit Obama në San Francisko.

Prokurorët nuk e kanë identifikuar burimin apo shtetasin e huaj, por hetimi u krye pas kërkesës së kongresmenit republikan Dana Rohrabaher, i cili u tha autoriteteve se i huaji që ka përdorur këtë biletë është Edi Rama, i cili ka tentuar të hyjë me njërën nga biletat e familjes Shehu, por nuk është lejuar brenda dhe fotografinë e ka bërë në dalje.

Kongresmeni ka paraqitur foton e Edi Ramës dhe Barack Obamës në San Francisko duke thënë se, ajo është përdorur nga kreu i atëhershëm i opozitës për qëllim mashtrimi, që të linte të kuptohej përpara zgjedhjeve që e sollën në pushtet për një marrëdhënie të afërt me presidentin amerikan.

Zyra e kongresmenit nuk bëri asnjë koment të mërkurën për agjencinë “Reuters”, e cila ka ndjekur seancën gjyqësore në ngarkim të Bilal Shehut, që ka bërë donacionin me fonde të huaja.

Gjyqi i ardhshëm është më 5 tetor dhe ai përballet me një dënim prej maksimumi 5 vjet heqje lirie, si dhe me një gjobë prej 250.000 dollarë