Rama: E prisja bllokimin e Vettingut nga PD, por jo refuzimin për zgjedhje

Kryeministri Edi Rama tha se e kishte më herët parandjenjën që PD do të bllokonte Vettingun, por kurrë nuk e kishte menduar se ata do të refuzonin të hynin në zgjedhje. Sipas tij, Vettingu bllokohet nga demokratët, për të mos lejuar zbatimin e reformës.

“Kam pritur nga PD bojkotin e Vettingut, por nuk kam pritur lidhjen e kësaj me zgjedhjet. Kundërshtari bëri një lëvizje surprizë dhe mori përsipër në kuadër të strategjisë së vet një aksion shumë të rrezikshëm për vetveten por jo pa asnjë shans për të pasur sukses.

Mundësia potenciale ishte për të destabilizuar koalicionin, duke u përpjekur të përçajë koalicionin dhe mikluar Ilir Metën dhe LSI. Duke e njohur shumë mirë Ilir Metën dhe mënyrën e funksionit të LSI-së kam qenë i bindur se të gjithë përpjekjet e bëra nga Ilir Meta ishin pjesë e natyrshme e filozofisë së tij dhe mënyrës si është spostuar LSI në karrierën politike”, deklaroi kryeministri.

Ai dha informacion në lidhje me përgatitjen e zgjedhjeve. Ai u shpreh se pas dekretimit të zgjedhjeve, në partinë e tij nisën punën për të përcaktuar strategjinë.

“Siç e dini, presidenti i Republikës dekretoi zgjedhjet më 18 qershor me një dekret të fundvitit të kaluar. Në momentin kur bëhet e ditur data e zgjedhjeve, në partinë tonë zhvillohet një punë për të bazuar strategjinë dhe kjo bëhet me forma të ndryshme, nëpërmjet anketave, fokus-grupet etj.

Ne bëmë kalendarin tonë dhe filluam punën për zgjedhjet e 18 qershorit”, tha Rama.