Rama në Fier: Do të dixhitalizojmë hipotekën
Kryeministri Edi Rama nga Zharrëzi i Fierit, ku po shpërndan leje legalizimi për banorët, premtoi modernizimin e shërbimit të hipotekës, shërbim ky që, sipas tij, shpesh është kthyer në çështje favoresh.
“ALUIZNI shumë shpejt do të kryejë aplikimin për tapinë e banesës suaj vet pranë Hipotekës. Kjo pasi duam të shmangim vonesat. Duam ta dixhitalizojmë këtë shërbim për të mos e lënë më një histori personale apo histori favoresh”, deklaroi Rama.
Kreu i qeverisë tha se nga kjo qeverisje brenda një viti janë shpërndarë 42 mijë leje nga 21 mijë që shpërndau Partia Demokratike në 8 vite. Pjesa dërrmuese, u shpreh kryeministri Rama, për të mos thënë 100 %, janë shtëpi.
“Më vjen mirë që Partia Demokratike, qeveria e vjetër, vetediskretitohet çdo ditë, duke i trajtuar shqiptarët si të painformuar”, tha Rama.
Rama iu përgjigj edhe akuzave për kontrollin shëndetësor falas. “Thonë që kontrolli mjekësor falas është një korrupsion, një farsë, ndërkohë janë 10 mijëra qytetarë që po e përfitojnë çdo muaj. Pra do të thotë se janë shqiptarët, që kanë sy e veshë, pavarësisht se cilave bindje partiake i përkasin, edhe ata që nuk janë me ata që drejtojnë sot qeverinë, e bëjnë dallimin”, u shpreh kryeministri.
Kryeministri Rama duke folur për modernizimin e procesit të hipotekimit të banesave tha se për disa prona po ribëhet leja e legalizimit për shkak të mbivendosjeve të hartave.
