Rama në Kukës: Ulja e taksave, nxitje për punësimin

Në kuadër të turi “Të pastrojmë më tej Shqipërinë”, kryeministri Edi Rama ka qenë paraditen e kësaj të shtune në Kukës.

Në fjalën e tij para të pranishëmve, Rama e ka vënë theksin tek masat e qeverisë së tij për favorizimin e biznesit të vogël dhe në veçanti bujqësisë.

“Qeveria bëri zero taksën për biznesin e vogël dhe taksa zero për biznesin e vogël do të thotë nxitje e punësimit. Gjithashtu, çuam në 5 për qind taksën për biznesin që bën 5 deri në 8 millionë lekë xhiro në vit”, ka deklaruar Rama.

Kreu i ekzekutivit ka theksuar se, shembulli i njeriut të punës duhet të promovohet dhe vlerësohet, ndërsa ka vlerësuar si të një rëndësie jetike formalizimin e punonjësve.

“Kemi krijuar një fond garancie për bujqësinë. Gjatë këtij viti kemi një rritje të eksporteve të produkteve bujqësore. Nga ana tjetër është shumë e nevojshme që fermerët të jenë të formalizuar”, ka thënë Rama.

Ai ka shprehur habinë e tij me pretendimet e opozitës, se qeveria po vjedh e po gjobit tregtarët dhe ka theksuar se, tregtarëve nuk u vjen asnjë e keqe nga lëshimi i kuponit.