Rama në Kuvend: Shqipëria mund të mos preket nga kriza e refugjatëve

I sapokthyer nga Hong Kongu, kryeministri Edi Rama ka informuar deputetët lidhur me vizitat e tij të fundit jashtë shtetit, dukeu ndalur tek takimi i vendeve të rajonit për krizën e refugjatëve. Shqipëria mund të mos preket nga kriza, tha Rama, por shpreh gatishmërinë të përfshihet në planin e Bashkimit Europian.

“Është kërkuar disponibiliteti i vendeve të rajonit për të pranuar sistemin e mosshfryrjes së menjëhershme të refugjatëve në vendin tjetër, përgjatë korridorit ku siç e dini Shqipëria nuk bën pjesë. Shqipëria nuk është e prekur dhe gjasat janë se edhe mund të mos preket, pavarësisht se me ardhjen e dimrit ekziston një skenar i UNHCR-së që fluksi mund të ngecë në Ballkan dhe po ashtu këtë mund ta bëjë më të pranishme shtrëngesa që vetvetiu do të vijë qoftë nga ana e Gjermanisë dhe Austrisë. Sidoqoftë, Shqipëria është e gatshme të përfshihet në të gjithë programin e BE-së dhe në një projekt të qartë që në epiqendrën e vet ka Gjermaninë dhe Austrinë”, tha Rama.

Referuar çështjes së azilkërkuesve, kryeministri Edi Rama theksoi dhe njëherë se shqiptarët që shkojnë drejt Gjermanisë nuk janë vetëm shqiptarë nga Shqipëria, por emigrantë shqiptarë në Greqi.

Në foltoren e Kuvendit, kryeministri sqaroi edhe disa akuza të fundit për maxhorancën. Referuar votës në OKB për heqjen e embargos së Kubës, Rama tha se kjo është një rezolutë që kalon çdo vit sesion vit pas viti në OKB, dhe se Shqipëria ka votuar gjithmonë njësoj.