Rama në Librazhd: “Rilindja urbane” do të jetë e pandalëshme!

Ndërsa ka hyrë në vitin e fundit të qeverisjes, kryeministri socialist Edi Rama vazhdon të ndjeki hap pas hapi një nga projektet më të mëdhenj të inicuar prej, “Rilindjen Urbane”. Zoti Rama ishte të dielën në Librazhd, ku ndërsa pa nga afër realizimet tha se Rilindja Urbane do të jetë e pandlashme edhe në të ardhmen.

“Unë e kam shumë të qartë që këtu ka ende shumë nevoja, por është e rëndësishme që të gjithë njerëzit duhet të kuptojnë se ky është një proces i pandalshëm dhe shumë i shëndetshëm i zhvillimit urban. Përmirësimi i cilësisë si nata me ditën i hapësirës publike, në qytetin bazë të bashkive të reja, është një mesazh shumë i qartë për çdo banor të bashkive në fshatin më të largët” tha zoti Rama. Sipas tij kjo “… është e vetmja mundësi për të krijuar komunitet, bashkëjetesë, sens përkatësie dhe për t’u shkëputur psikologjikisht nga ndarja dhe izolimi”.

Kryeministri tha se transformimi urban i Shqipërisë do të shoqërohet me rritje të aktivitetit të bizneseve. “Ajo që njerëzit nganjëherë nuk e perceptojnë, për shkak të propagandës së kazanit, është që kjo lloj qasjeje sjell rritje të ekonomisë lokale, sepse sjell rritje të dëshirës për të bërë biznes të vogël. Sjell rritje të dëshirës për të konsumuar, e patjetër edhe rritje të vetëpunësimit, ose të punësimit të vogël” tha zoti Rama.