Rama replikë me Reporterët pa Kufij: Vlerësimi për median në Shqipëri, i paplotë. Zëri i opozitës, 3.57 herë më i lartë se i qeverisë, kjo s’tregon median e kapur

Kryeministri Edi Rama ka reaguar sërish ndaj organizatës Reporterët pa Kufij (RSF), pas publikimit të indeksit më të fundit për lirinë e medias, ku Shqipëria renditet në vendin e 83-të, duke shënuar rënie nga një vit më parë.

Në një postim në rrjetin social X, Rama e cilëson vlerësimin e RSF si jo të mbështetur plotësisht në realitetin empirik, ndërsa kundërshton raportin ku citon se Shqipëria është një vend me media të kapura nga qeveria dhe se gazetarët janë nën sulm politik.

Duke iu referuar një analizë të realizuar nga një startup shqiptar i bazuar në inteligjencë artificiale, Rama thotë se zëri i opozitës është 3.57 herë më i lartë se ai i qeverisë dhe se tonik kritik në mediat shqiptare ndaj qeverisë është 6.4 herë më i fortë se mbulimi pozitiv.

“I nderuar @RSF_inter, Duke qenë se dje po mendonit për mua, gjë që e vlerësoj sinqerisht, sot në mëngjes e gjeta veten duke menduar për ju, për shkak të një burimi të jashtëzakonshëm të bazuar në AI – një startup shqiptar që mund të jetë shumë i dobishëm për misionin tuaj – i mbështetur në fakte të thjeshta empirike 👉 https://melloë-figolla-74f91c.netlify.app dhe në versionin anglisht për ta bërë më të lehtë për ju https://thunderous-ganache-18fd87.netlify.app

Mbi 4,500 artikuj të analizuar, në 43 media, gjatë 66 ditëve monitorim.

Zëri i opozitës: 3.57 herë më i lartë se ai i qeverisë.

Burimet kritike: 4.67 herë më dominuese se ato pro-qeveritare.

Toni kritik: 6.4 herë më i fortë se mbulimi pozitiv.

Më shumë se 15 figura të opozitës janë vazhdimisht të pranishme në tituj.

Përmendjet e opozitës: 1,828 kundrejt 925 për Kryeministrin dhe qeverinë së bashku.

Edhe individualisht, liderët e opozitës tejkalojnë, me një prej tyre që i kalon përmendjet e Kryeministrit në media.

Dhe në vetë titujt:

368 citime të drejtpërdrejta nga opozita kundrejt 108 nga qeveria, një dominim 3.4 herë më i madh.

Akuzat më të ashpra ndaj qeverisë dhe ndaj meje qarkullojnë lirshëm në rreth 70 tituj, ndërkohë që nuk ka asnjë provë për ndonjë nivel të ngjashëm sulmesh ndaj mediave anti-qeveritare, apo edhe ndaj kundërshtarëve politikë. Sepse thjesht nuk ekziston.

Dhe sipas rregullatorit shtetëror, AMA, opozita mbajti 60.12% të kohës televizive politike në mars, ndërsa vetë qeveria zuri një pjesë shumë më të vogël.

Këto nuk janë perceptime.

Këto janë fakte të matshme.

Në një mjedis vërtet “të kapur mediatikisht”, asnjë nga këto nuk do të ekzistonte.

As dominimi i zërit të opozitës.

As mbizotërimi i narrativave kritike.

As qarkullimi i lirë i akuzave ekstreme.

Dhe sigurisht jo shumica e kohës televizive politike për opozitën”, shkruan Rama.

“Këto nuk janë perceptime, por fakte të matshme”, thekson Rama, duke argumentuar se në një vend me media të “kapura”, një dominim i tillë i zërit kritik dhe opozitar nuk do të ishte i mundur.

Ai pranon se ka probleme reale lidhur me pronësinë e mediave dhe kushtet e punës së gazetarëve, por kritikon RSF për, sipas tij, injorimin e këtyre të dhënave që e bën analizën e paplotë.

“Ne i marrim shumë seriozisht shqetësimet për pronësinë e mediave dhe kushtet e punës së gazetarëve. Këto janë çështje reale dhe duhet të adresohen. Por të injorosh plotësisht realitetin empirik dhe ta paraqesësh Shqipërinë si një vend me media të kapura dhe gazetari nën sulm politik?

Në rastin më të mirë, kjo e bën analizën jo vetëm të paplotë, por edhe më të dobët. Dhe si pasojë, edhe renditjen të paragjykuar.

Kjo është e gjitha.

P.S. Do të jetë për një ditë tjetër të shpjegoj teorinë time se si mund të fitohen zgjedhjet duke bërë pikërisht të kundërtën e kontrollit të mediave: duke lejuar që i gjithë vërshimi i “helmimit” politik anti-qeveritar të mbushë hapësirën publike, dhe duke i treguar kështu qytetarit të zakonshëm vlerën reale të atyre që qëndrojnë pas tij”, shkruan Rama në X.