Rama takon Mustafën: Rezultate konkrete nga mbledhjet e 2 qeverive

Kryeministri i Kosovës, Isa Mustafa ka pritur sot në Prishtinë në një takim kryeministrin e Shqipërisë, Edi Rama. Pas takimit, dy kryeministrat deklaruan se diskutuan për mledhjen e ardhshme të dy qeverive dhe marrëdhëniet mes dy vendeve.

Kryeministri Rama vlerësoi se takimet e përbashkëta kanë dhënë rezultate konkrete dhe shumë të mira.

“Mjafton të shohim shifrat e shkëmbimeve tregtare dhe të eksportit në të dy anët e kufirit për të kuptuar jo vetëm se sa shumë është bërë së bashku, por edhe se çfarë potenciali të madh ka, sepse ka ende probleme për t’u adresuar dhe çështje për t’u zgjidhur, në mënyrë që kjo hapësirë të jetë një hapësirë e lirë shkëmbimesh dhe një hapësirë ku përmes këtyre shkëmbimeve të arrihet mirëqenia e popullit tonë në të dy anët”, u shpreh Rama.

Ndërsa kryeministri Isa Mustafa tha se, në takimin e radhës do të bëhet vlerësimi i punëve të deritanishme dhe të aktiviteteve të përbashkëta, duke e vlerësuar bashkëpunimin me Shqipërinë si të një interesi të veçantë.

Kryeministri Rama, i cili po qëndron në Kosovë me rastin e betimit të Hashim Thaçit si president, është pritur në takim edhe nga kryeparlamentari Kadri Veseli.