Reagon ashpër Spaho: Opozita e lodhur dhe e paaftë, është qindra kilometra larg rikthimit në qeverisje

Edmond Spaho ka lëshuar akuza në drejtim të linjës që po ndjek opozita, duke e cilësuar atë të paaftë dhe krejtësisht jashtë realitetit politik.

Përmes një reagimi në rrjetet sociale, Spaho u ndal te një zhvillim i rëndësishëm për integrimin e vendit, duke bërë me dije se nesër pritet të miratohet raporti nga Këshilli i Ambasadorëve, ndërsa më 26 Maj do të mbahet Konferenca Ndërqeveritare mes Shqipërisë dhe Bashkimit Europian.

Sipas Spahos, ky është një moment që opozita duhet ta përshëndeste, por në vend të kësaj, ajo po vazhdon me të njëjtat refrene dhe akuza të vjetra që nuk i beson më askush.

“Kjo eshte nje ngjarje shume e rendesishme per Shqiperine dhe shqiptaret. Neser ky raport miratohet nga Keshilli i Ambasadoreve dhe me 26 Maj mbahet Konferenca Nderqeveritare midis Shqiperise dhe BE.
Opozita duhej ta pershendeste kete akt.
Per fat te keq ajo eshte teresisht jashte realitetit, e lodhur, e paafte. Fjalori i saj vazhdon te jete i vjeter me akuza te sterthena e qe nuk ngjisin tek qytetaret, pale me tek partneret europiane.
Demin nuk ja ben Shqiperise por vehtes dhe demokrateve te cilet jo vetem nuk jane tek kilometri i fundit por jane qindra kilometra larg rikthimit ne qeverisje”, shkruan Spaho.