Reforma në drejtësi, opinioni final i Venecias zmbraps disa kërkesa të opozitës

Opinioni final i Komisionit të Venecias për reformën në drejtësi ndryshon në tetë paragrafë të tij, kryesisht këto ndryshime teknike, krahasuar me dokumentin që ky organizëm nxori në fund të muajit shkurt. Ky qëndrim i Venecias e ngushton hapësirën për debat mes partive politike, duke shmangur disa çështje nga draftet e mëparshme.

Në planin politik, kjo do të thotë që Partisë Demokratike të opozitës t’i bien disa pika nga 11 kritikat që ajo e kushtezoi dialogun e saj politik me mazhorancën një javë më parë.
Opinioni final e ngushton hapësirën për debat politik vetëm tek shumica e cilësuar që lidhet me emërimet në disa institucione të reja të sistemit të drejtësisë.

Ndërkohë që ky dokument nuk flet për asnjë nga insitucionet kyçe të reformës në drejtësi, siç është Këshilli i Larte i Emërimeve, që opozita e rendit të parin ndër kushtet e saj. Po ashtu, Opinioni final nuk përmend as Gjykatën e Lartë Administrative, për të cilën PD, por dhe LSI, kishin kontestime për ekzistencën e saj.

Forcat politike ende nuk kanë reaguar rreth këtij dokumenti te ndryshuar te Komisionit, që u bë publik nga mediat të martën në mbrëmje.