Reforma zgjedhore, Ahmetaj: Maxhoranca, dakord për ngritjen e komisionit

Njësia e koordinimit të koalicionit qeverisës ka rënë dakord këtë të premte për ngritjen e komisionit për reformën zgjedhore.

Të pranishëm në takim, krahas kryeministri Edi Rama dhe kryeparlamentarit Ilir Meta, ishin dhe kreu i PDIU-së, Shpëtim Idrizi, krerët e grupeve, Gramoz Ruçi dhe Petrit Vasili, ministri Arben Ahmetaj etj.

“Reforma zgjedhore, u ra dakord të ngrihet komisioni, po thelbi është që ka dakordësi të plotë të aleancës. Në parim, është rënë dakord të krijohet komisioni dhe aleanca është me një mendim unik”, u shpreh Arben Ahmetaj pas takimit.

Një ditë më parë “Top Channel” zbuloi edhe letër përgjigjen që kreu i grupit parlamentar socialist Gramoz Ruçi, i ka dërguar kreut të Kuvendit Ilir Meta.

Ministri Ahmetaj bëri të ditur se njësia e koordinimit u rakordua për votimin e ligjeve të rëndësishme në seancën e 17 dhjetorit, si ajo e pushtetit vendor që kërkon votë të cilësuar, apo dhe diskutimi nen për nen i buxhetit të 2016.