Renzi pëson humbjen e parë mbi reformën e Senatit

Qeveria e kryeministrit italian, Matteo Renzi pësoi humbjen e saj të parë sot mbi një projektligj për ristrukturimin e Senatit, kur Dhoma e Lartë votoi për të miratuar një amendament lidhur me zgjerimin e përgjegjësive të saj. Amendamenti kaloi në një votim të fshehtë, me 154 senatorë në favor, 147 kundër dhe dy abstenime. Ditë më parë, Renzi kishte deklaruar se nuk do të ishte i befasuar nëse në këtë votim të fshehtë edhe anëtarë të partisë së tij do të votonin pro duke prishur kështu homogjenitetin e partisë së tij. Ai deklaroi se ka besim se qeveria do të jetë në gjendje të rregullojë këtë zhbalancim kur projektligji të arrijë në Dhomën e Ulët të parlamentit italian. Renzi kërkon shndërrimin e Senatit në një kuvend të vogël në numër të përfaqësuesve lokalë, me kompetenca minimale të fuqisë ligjvënëse për të kursyer para dhe kalim më të lehtë të legjislacionit. Por, projektligji po përballet me kundërshtimin e patundur nga partitë e krahut të majtë dhe Lëvizja Pesë Yjet, përfshirë pakicat brenda PD-së së Renzit dhe partisë së ish-kryeministrit Silvio Berlusconi.