Republikanët e Senatit amerikan forcojnë kredencialet e përballueshmërisë para zgjedhjeve të mesmandatit

Republikanët e Senatit të Shteteve të Bashkuara planifikojnë të forcojnë kredencialet e tyre mbi përballueshmërinë vetëm disa javë para zgjedhjeve të mesmandatit të 3 nëntorit, duke u kthyer në Uashington javën e ardhshme për të votuar “Aktin për Mbrojtjen e Konsumatorëve” (Ratepayer Protection Act) — një projektligj që synon të mbrojë konsumatorët nga faturat e larta të energjisë të shkaktuara nga qendrat e të dhënave të inteligjencës artificiale.

Akti do t’u kërkonte rregullatorëve shtetërorë të shqyrtonin nëse përdoruesit e mëdhenj të energjisë elektrike, si qendrat e të dhënave, duhet të mbajnë kostot shtesë të infrastrukturës, në vend që ato t’u ngarkohen familjeve. Projektligji ka kaluar Dhomën e Përfaqësuesve me 417 vota kundër 3, ndërsa votimi procedural në Senat pritej të mërkurën, raporton Reuters.

Nisma vjen me kërkesën e senatorit republikan Jon Husted nga Ohio, i cili në sondazhe mbetet pas kandidatit demokrat Sherrod Brown — në një shtet që presidenti Donald Trump e fitoi me më shumë se 11 pikë në vitin 2024. Kthimi i Senatit për këtë votim javën e ardhshme shihet si një lëvizje e drejtpërdrejtë elektorale.

Lëvizja është shenja e fundit e ankthit republikan përballë miratimit rekord të ulët të presidentit Trump, më pak se gjashtë javë para zgjedhjeve, në të cilat republikanët shpresojnë të ruajnë shumicën në Senat dhe në Dhomën e Përfaqësuesve. Kandidatët republikanë për Senat Mike Rogers në Michigan dhe Allison Hinson në Iowa kanë kërkuar fund të shpejtë të luftës me Iranin — konflikt që ka ndërprerë furnizimet me naftë dhe ka rritur çmimet e energjisë — ndërsa senatori Roger Marshall i Kansasit ka shprehur shqetësim për zbatimin e operacioneve të emigracionit.

Udhëheqësi i shumicës në Senat, John Thune, e pranoi klimën e vështirë zgjedhore. “It’s not a great environment. There are headwinds we’re facing in all the races around the country”, tha ai, duke shtuar se demonstrimi i pavarësisë nga Trump-i në çështjet lokale është mënyra më e mirë për të fituar. Sipas sondazhit të fundit Reuters/Ipsos, mbështetja e partisë për Trump-in ka rënë me 9 pikë, në 73 për qind, brenda një jave, ndërsa në shtetet kyçe — Georgia, Iowa, Maine, Karolina e Veriut dhe Teksas — miratimi i tij qëndron me shifra dyshifrore nën votën që mori në vitin 2024.

Demokratët bllokuan javën e kaluar përpjekjen e Husted për ta kaluar aktin me konsensus unanim dhe kanë propozuar një alternativë, “GRID Savings Act”, që do të ishte detyruese dhe jo vullnetare. Udhëheqësi demokrat i Senatit, Chuck Schumer, e quajti propozimin e Husted “mashtrim”, pikërisht sepse ai është vullnetar.

Burimi: Reuters