“Respekt dhe jo teatër”/Debate opozitë-maxhorancë për policin e vrarë, Kuvendi mban 1 minutë heshtje

Me kërkesë të kryetarit të grupit parlamentar socialist Balla, parlamenti mbajti një minutë heshtje në nderim të punonjësit të policisë së rënë në krye të detyrës në zonën e Maliqit.

“Gjaku i Policisë së Shtetit është gjaku i vetë shtetit. Kush ngre dorë kundër punonjësve të policisë ka ngritur dorë kundër shtetit. Përulemi sot me respekt dhe mirënjohje para sakrificës së dëshmorit të atdheut Enea Mekolli”, tha Balla.

Por opozita akuzoi Ministrinë e Brendshme se viktima në radhët e bluve do të ishte shmangur nëse aksioni do të ishte i mirëorganizuar.

“Një efektiv policie humb jetën për shkak se sot delegohen operacionet me udhëzime dhe me urdhra. Operacione që bëhen për njerëz të rrezikshmërisë së lartë. Tek protestuesit çoni forca speciale, çoni apashe, antitanke, çfarë nuk çoni, kurse atje çoni policinë. Mirë që nuk çuat policinë rrugore”, tha Klevis Balliu.

“Ajo çfarë duhet të pasojë duhet të jetë respekti dhe jo teatri. Duke bërë të njëjtin mëkat, duke anatemuar Policinë e Shtetit, duke përdorur sulm verbale dhe intimiduese në Policinë e Shtetit. Policia është e shtetit”, tha ministri Lamallari.

Debatet u zhvilluan gjatë interpelancës së Ministrit të Brendshëm, thirrur nga deputeti Balliu. Ndërkohë opozita e cila kishte thirrur në interpelancë kryeministrin Rama nuk pranoi delegimin e tyre.

Sipas opozitës, neni 80 i Kushtetutës detyron shefin e qeverisë të dalë para deputetëve nëse këta të fundit e kërkojnë.

Ndërsa për qeverinë kryeministrit gëzon atributet ligjore të delegimit të kompetencave në kuvend.