Rezerva Federale: Në tetor merr fund mbështetja për ekonominë
Në kushtet kur ekonomia amerikane është duke u përmirësuar, formuluesit e politikave në Rezervën Federale në Uashington thonë se kanë në plan t’i japin fund në muajin tetor mbështetjes së drejtpërdrejtë për ekonominë më të madhe të botës.
Që nga fundi i vitit 2012, Rezerva Federale ka blerë çdo muaj letra me vlerë me vlerën e 85 miliardë dollarëve. Ky program synon t’i mbajë në një nivel shumë të ulët interesat afatgjatë, në përpjekje për t’i dhënë një shtytje krijimit të vendeve të punës dhe kredive bankare, për t’i ardhur në ndihmë ekonomisë që të rimëkëmbet nga recesioni i thellë i vitit 2008.
Rezerva Federale i ka pakësuar vazhdimisht blerjet mujore te aseteve dhe me pare kishte deklaruar se në se gjendja financiare e vendit vazhdonte të përmirësohej, do t’i jepte fund këtyre blerjeve në fund të vitit, por pa dhënë një datë specifike.
Por të mërkurën, formuluesit e politikave ekonomike publikuan dokumentet e takimit të tyre në mesin e qershorit, sipas të cilave Rezerva Federale synon t’i japë fund blerjes së letrave me vlerë në tetor, “në se ekonomia vazhdon të përparojë” me ritmin e deritanishëm, siç pritet.
Më tepër se 9 milionë amerikanë vazhdojnë të jenë të papunë. Por tregu i punës ka filluar të përmirësohet, duke shtuar vende pune me ritmin më të shpjetë që nga viti 1999. Si rrjedhoje, edhe ritmi i papunësisë ra në 6,1 për qind në muajin qershor, shifer kjo më e ulta në 6 vitet e fundit.
