Ristani: Droga ka pushtuar vendin, Rama dhe Tahiri sërish në krahë të trafikantëve
Sekretari i Përgjithshëm i Partisë Demokrate, Arben Ristani, deklaroi se monitorimi nga ajri tregon se sipërfaqja e mbjellë me drogë në vetëm 17% të territorit që u vrojtua, është 5 herë më e madhe se një vit më parë.
“Vetëm për 17 për qind të territorit 5 herë më shumë drogë se vjet. Po në 83 për qind të territorit që nuk u vrojtua dot? Nuk u vrojtuan dot as brigjet e lumenjve dhe zona të tjera përgjatë akseve kombëtare dhe qendrave urbane, ndonëse janë mbushur me drogë si kurrë më parë. Droga është shtrirë në gjithë vendin dhe ka pushtuar toka edhe pranë akseve kombëtare si në Rinas, apo në zona urbane. Gënjeshtrat dhe mashtrimet e Ramës dhe Tahirit kanë plasur si tullumbace”, deklaroi Ristani.
Sipas tij, çdo shqiptar e di se droga ka mbuluar vendin por Rama dhe Tahiri u fshehën pas raportit tronditës e më pas dolën dhe rrahën shpatullat e njëri-tjetrit.
“Edhe sot, Tahiri tha se: ‘Janë kultivuar 30 për qind më pak drogë dhe policia ka asgjësuar 98 për qind të sipërfaqes së mbjellë me drogë. Beteja është e pabarabartë’ dhe kjo e bëka hero Tahirin që po lufton këtë betejë të pabarabartë. Betejë e pabarabartë, e pabarabartë me kë? Krimi qenka mbi policinë, krimi qenka superior me shtetin? Si pohon vetë Tahiri, duke pranuar pabarazinë me krimin. Pikërisht këtë po themi, me forcë çdo ditë që krimi është mbi shtetin, sepse krimi ka kapur shtetin, sepse krimi është vetë shteti, dhe lufta me shtetin e kriminuar është sigurisht e pabarabartë”, vijoi Ristani.
Ristani deklaroi se Tahiri po bën gjoja sikur punon, “por nuk ka arritur së pari të parandalojë mbjelljen e qindra hektarëve drogë, nuk ka arritur të kapë askënd nga bosët e drogës, me përjashtim të të pamundurve”.
“Çdo ditë, nga Ura e Tapizës e deri në Fushëkrujë, në orët e para të mëngjesit, dhjetëra gra e fëmijë transportohen me furgonë në malet e Krujës për të përpunuar hashashin. Nxënësit e shkollave helmohen me drogën që është bërë e pranishme kudo. Banditët ju presin rrugën prokurorëve dhe policia hesht” , u shpreh Ristani.
Sipas tij, mbrëmë policia me urdhër të Tahirit fshehu ndalimin e Qefalive me 50 kilogramë kanabis të tharë, dhe vetëm pas denoncimit të PD, u detyrua të japin informacion.
“Viktima në Shëngjergj, i vrarë me armë zjarri, është për parcelat e drogës, dhe me më këtë rast bëhen 7 jetët e humbura nga konliktet për kanabisin vetëm në pak javë. Pse e mohon deri në fund, dhe pse e mbron deri në fund, Edi Rama, drogën dhe Tahirin? Sepse është vetë i përfshirë. Ky është biznesi kriminal që është ndërtuar me lejen dhe bekimin e Edi Ramës. Karteli i drogës që ka krijuar në vend, është arma e tij që të mbajë me çdo kusht pushtetin, të ruajë miliardat e krimit dhe korrupsionit. Shqiptarët gjenden përballë një pushteti narkotrafikant. Një pushteti që synon të drogojë mbarë vendin. Por shoqëria jonë i ka mekanizmat për ta mbrojtur veten, për ta mbrojtur familjen, fëmijët dhe të ardhmen. Shqiptarët do të dijnë të reagojnë. Shqipëria më mirë pa drogë. Shqipëria më mirë pa Edi Ramën”, deklaroi Ristani.
