ROMË – Papa Leone XIV shtrohet në spital për një ndërhyrje në mushkëri

ROMË, 12 tetor /ATSH-ANSA/- Papa Leone XIV pritet të shtrohet nesër në mëngjes në spitalin “Gemelli” të Romës, për t’iu nënshtruar një ndërhyrjeje kirurgjikale për heqjen e një mase të vogël në mushkëri, njoftoi sot Vatikani.

Nuk është bërë ende e ditur nëse ndërhyrja do të kryhet po atë ditë.

Pavarësisht ndërhyrjes së planifikuar, kreu 71-vjeçar i Kishës Katolike vijoi sot aktivitetet e tij zyrtare, duke zhvilluar disa takime private të planifikuara dhe një audiencë me një grup personash në Vatikan.

Më vonë, Prefektura e Shtëpisë Papnore njoftoi se të gjitha takimet e papës deri më 20 tetor, përfshirë edhe atë ditë, janë anuluar për shkak të shtrimit të tij në spital.

Pas lutjes së së dielës, të njohur si “Angelus”, papa Leone bëri të ditur se gjatë një kontrolli rutinë, ishte zbuluar një nodul në mushkëri, një masë e vogël indi, në një fazë shumë të hershme.

“Mjekët e konsiderojnë të përshtatshme ndërhyrjen”, tha ai, duke shtuar se kishte vendosur të ndiqte këshillën e tyre dhe t’i nënshtrohej operacionit për heqjen e masës.

Zëdhënësi i Vatikanit, Matteo Bruni, tha se papa pritet të qëndrojë rreth një javë në spital pas ndërhyrjes.

Deri tani nuk janë publikuar hollësi të tjera mjekësore.

Spitali “Gemelli”, i vendosur në periferi të Romës, ka një pavijon të posaçëm për papët që kanë nevojë për trajtim spitalor.

Paraardhësi i Leone XIV, papa Françesku, u trajtua në këtë spital pak kohë para vdekjes së tij, në prill të vitit 2025.

Që në rini, Françesku kishte jetuar me një pjesë të mushkërisë të hequr.

Një nodul në mushkëri mund të ketë shkaqe të ndryshme.

Ai mund të jetë pasojë e një inflamacioni ose infeksioni të mëparshëm, një formacion beninj (jo kanceroz), kancer i mushkërive ose përhapje e kancerit nga një pjesë tjetër e trupit.

Për të përcaktuar me siguri natyrën e masës, shpesh nevojitet marrja e një mostre indi për analizë ose heqja e saj me ndërhyrje kirurgjikale.

Megjithatë, shumë nga nodujt që zbulohen gjatë kontrolleve rutinë nuk janë kancerogjenë.

Në moshën 71-vjeçare, Leone konsiderohet relativisht i ri për një papë.

Ai kujdeset për formën fizike duke luajtur tenis, duke notuar dhe duke bërë rregullisht ushtrime fizike.

Deri më tani, nuk ishin bërë publike probleme shëndetësore të papës. /