Rregullatori bankar amerikan lëshon udhëzimin e parë për inteligjencën artificiale: mbikëqyrësit të mos e trajtojnë si rrezik më vete

Zyra e Kontrollorit të Monedhës (OCC), që mbikëqyr bankat e mëdha kombëtare amerikane, lëshoi të mërkurën (4 nëntor) atë që e quajti udhëzimin e parë ndonjëherë për mënyrën se si ekzaminuesit duhet të shqyrtojnë përdorimin e inteligjencës artificiale nga bankat, siç njofton Reuters, i cili pa një kopje të dokumentit dhe e raportoi i pari kornizën e re.

Sipas kornizës së re, mbikëqyrësit e bankave të mëdha duhet të monitorojnë mënyrën se si huadhënësit përdorin inteligjencën artificiale, por nuk duhet ta trajtojnë atë si të dallueshme nga rreziqet e tjera. Bankat nuk pritet të vendosin parametra të veçantë rreziku për përdorimin e AI-së dhe ekzaminuesit nuk duhet ta trajtojnë teknologjinë si rrezik unik; ata duhet të marrin parasysh mënyrën se si huadhënësi e përdor AI-në, si dhe madhësinë dhe kompleksitetin e huadhënësit.

OCC tha se ekzaminuesit duhet të përqendrohen te pasojat e gabimeve të mundshme të shkaktuara nga AI në banka, jo te sofistikimi i modeleve të veçanta. Si shembull, dokumenti përmend se një agjent i thjeshtë i AI-së i autorizuar të nisë transaksione mund të konsiderohet më i rrezikshëm se një model i sofistikuar i përdorur për qëllime të brendshme, ndërsa përdorimet me rrezik më të lartë mund të kërkojnë kufizime më të mëdha të autonomisë ose mbikëqyrje më të drejtpërdrejtë njerëzore.

Dokumenti nuk është ligjërisht detyrues si një rregullore, por bankat zakonisht i përmbahen nga afër udhëzimeve të tilla. Rregullatorët bankarë në mbarë botën po i pyesin huadhënësit për përdorimin e AI-së, të shqetësuar se teknologjia paraqet rreziqe të mëdha kibernetike dhe potencialisht rreziqe për stabilitetin financiar; në SHBA rregullatorët i kanë pyetur bankat për modelet e avancuara të AI që përdorin, kufijtë që u vendosin atyre sistemeve dhe mënyrën se si i monitorojnë.