Rrjeti i gazit për familjarët, specialistët: Testi i parë në zonën Tiranë-Durrës

Furnizimi i konsumatorit familjar me gaz natyror, që do të vijë përmes gazsjellësit TAP, do të kërkojë mbi 10 vite.

Shqipërisë i duhet një investim i madh për të ndërtuar tubacionet e transmetimit dhe shpërndarjes. Ministria e Energjisë shpreson që në një periudhë afatmesme të kemi një rrjet të tillë së paku për rajonin Durrës-Tiranë. Investimi mund të jetë shtetëror ose privat.

“Shpresojmë që brenda 10 viteve të kemi një rrjet të transmetimit, shpërndarjes dhe furnizimit për familjarët. Kjo do të jetë edhe në varësi të modelit të biznesit që do të ndiqet”, shprehet Dritan Spahiu, drejtori i Hidrokarbureve, MEI.

Element kyç për realizimin e këtij investimi është përdorimi i gazit si alternativë reale e furnizimit me energji, duke ofruar çmime më të lira. Qeveria synon që përfitues të parë të gazit që vjen nga TAP të jenë termocentralet dhe industria.

“Do të kemi prodhimin e energjisë elektrike nga termocentralet me gaz natyror, siç është termocentrali i Vlorës, i cili është klasifikuar si prioritet kryesor. Si dhe do të kemi edhe furnizimin e klientëve industrialë me gaz natyror”, thotë Spahiu.

Shtrirja e rrjetit të shpërndarjes mund të ndihmojë nëse do të ndërtoheshin degëzimet e TAP që do të çonin gazin në Kosovë dhe Mali e Zi, dy projekte që janë ende në fazë studimi.