“Ne presim që të gjithë grupet parlamentare, duke përfshirë edhe opozitën të heqin dorë nga qëndrimi bllokues dhe të kthehen në Parlament për të vijuar menjëherë me reformën zgjedhore”, tha sot ambasadorja gjermane Susanne Schütz në takimin e Komisionit të posaçëm për Reformën Zgjedhore, mbajtur në ambientet e Kryesisë së Kuvendit.
Ambasadorja Susanne Schütz tha se “ne përshëndesim faktin që procesi i reformës zgjedhore po përparon nëpërmjet paraqitjes këtu ditën e sotme të një dokumenti pune”.
“Qeveria Federale Gjermane, Bundestag-u Gjerman dhe Bashkimi Europian kanë nënvizuar në mënyrë të përsëritur rëndësinë, të cilën ata i kushtojnë zbatimit të Rekomandimeve të OSBE/ODHIR në lidhje me kodin zgjedhor shqiptar. Gjermania mbështet financiarisht punën e ekspertëve të pavarur në procesin e reformës zgjedhore”, tha ambasadorja.
Diplomatja gjermane theksoi se “reforma e Kodit Zgjedhor shqiptar u theksua nga vendet anëtare të Bashkimit Europian në Këshillin e Përgjithshëm në muajin qershor si një hap i rëndësishëm për integrimin europian të Shqipërisë”.
“Duke pasur parasysh vendimin për hapjen e bisedimeve të anëtarësimit vitin që vjen, është e rëndësishme që të mos humbni kohë. Ne presim që të gjithë grupet parlamentare, duke përfshirë edhe opozitën të heqin dorë nga qëndrimi bllokues dhe të kthehen në Parlament për të vijuar menjëherë me reformën zgjedhore dhe për ta bërë atë të zbatueshme deri në zgjedhjet e ardhshme vendore”, apeloi ambasadorja e Gjermanisë në Shqipëri.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.