Shefi i Bankës Qendrore të Iranit: Përballemi me “luftë ekonomike” nga “qeveria e mizorisë” — SHBA-ja gaboi kur parashikoi shembjen

Guvernatori i Bankës Qendrore të Iranit, Abdolnaser Hemmati, e quajti qeverinë amerikane “qeveri mizorie” dhe tha se Irani po përjeton një “luftë ekonomike” të imponuar nga një superfuqi ekonomike, siç njofton Al Jazeera në liveblog-un e saj për luftën me Iranin.

Hemmati theksoi se dhjetë ditë më parë Shtetet e Bashkuara parashikuan se Irani do të përballej me shembje ekonomike brenda dy javëve — një parashikim që, sipas tij, ka dështuar. “Po, ne i dimë kushtet, problemet dhe presionet”, u shpreh ai, duke siguruar iranianët se qeveria ka një plan për të ardhmen.

Deklaratat vijnë në një moment kur ekonomia iraniane është nën presion historik: bllokada pothuajse totale detare e SHBA-së, sanksionet ndërkombëtare dhe lufta rajonale kanë sjellë tkurrje 10 për qind të PBB-së, rënie rekord të rialit dhe dorëheqjen e ministrit të Naftës Mohsen Paknejad.

Pavarësisht mesazhit qetësues të Hemmati-t, agjencitë ndërkombëtare vlerësojnë se dëmet e luftës i kalojnë 270 miliardë dollarët dhe se depozitat e naftës në ishullin Kharg po mbushen, duke e lënë Teheranin pa rrugëdalje për eksportet e energjisë.