Shërbimi Social, Rama: Gjendja e trashëguar, e rëndë si në fushat e tjera
Kryeministri Edi Rama u shpreh sot gjatë Konventës së Shërbimit Social Shtetëror se, ashtu si në të gjithë fushat e tjera edhe në këtë fushë gjendja e trashëguar është shumë e rëndë.
Është e qartë, tha Rama, “se kjo nuk është një Konferencë e radhës, por një moment për të bërë një bilanc të rëndësishëm me disa rezultate të rëndësishme”.
Nga ana tjetër, tha Kryeministri, “kjo vlen për të konsoliduar një instrument shumë të rëndësishëm për shoqërinë në luftën e varfërisë, që janë shërbimet sociale”
“Ashtu si në të gjithë fushat e tjera edhe në këtë fushë gjendja e trashëguar është shumë e rëndë”, tha Rama, duke shtuar se, “po kështu mund të shohësh energjinë, territorin, Lazaratin dhe me radhë të gjitha plagët e hapura që kemi trashëguar në organizmin e vendit dhe shoqërisë”.
Në këtë fushë, vijoi kryeministri Rama, “pavarësisht se është më e pazëshmja, pasi në të janë njerëzit më të pafuqishëm të shoqërisë, kemi trashëguar një gjendje që s’ka asnjë ndryshim nga lidhjet e paligjshme të energjisë apo në ndërtimet e paligjshme në territor”.
Kryeministri Rama gjithashtu u shpreh se qeveria mbylli gropën prej 6.2 miliardë lekë në pagesat e aftësisë së kufizuar, duke theksuar se “synimi ynë duhet të jetë e ardhmja, që fillon që me shtiminefondeve në buxhetin e vitit 2015”.
Kryeminstri Rama theksoi se reforma administrative territoriale do të sjellë një transformim tërësor në cilësinë e shërbimit shoqëror të shtetit, duke ndikuar në burimet e financimit si publike po ashtu edhe private.
