Shoferi humb jetën në aksidentin e rëndë në Uzhicë, plagosen gruaja, dy fëmijët dhe nëna e tij

Një aksident i rëndë trafiku ka ndodhur mbrëmë rreth orës 23:00 në Uzhicë, në rrugën magjistrale pranë sallës sportive “Veliki park”, ku ka humbur jetën shoferi N. Đ., banor i këtij qyteti, ndërsa katër anëtarë të familjes së tij kanë mbetur të plagosur, raporton Mondo.

Siç njofton Mondo, në automjetin me shoferin ndodheshin bashkëshortja e tij, dy fëmijët e tyre të mitur dhe nëna e tij. Të gjithë kanë pësuar lëndime dhe janë shtruar në spitalin e Uzhicës, por sipas informacioneve të disponueshme gjendja e tyre nuk është kërcënuese për jetën.

Sipas informacioneve jozyrtare që përcjell Kurir, automjeti “Kia” me targa të Uzhicës, i drejtuar nga N. Đ., po lëvizte nga drejtimi i Sevojnos drejt Uzhicës, kur ka kaluar në korsinë e kundërt dhe është përplasur ballë për ballë me një automjet “BMW” me targa të Beogradit, të cilin e drejtonte një i ri.

Mjekët e spitalit të Uzhicës kanë tentuar ta reanimojnë shoferin N. Đ., por, siç raporton Kurir, nuk kanë arritur t’ia shpëtojnë jetën.

Policia dhe prokurori kujdestar kanë kryer këqyrjen e vendit të ngjarjes, ndërsa rrethanat dhe shkaku i aksidentit do të përcaktohen pas hetimeve.