Shqipëria 6 vjet në NATO, Rama: E meritojmë vendin në aleancën e lirisë

Në ditën e 6-vjetorit të hyrjes së Shqipërisë në NATO, në repartin ushtarak të Zallherrit në Tiranë, është mbajtur një ceremoni festive.

Të pranishëm, përveç kryeministrit Edi Rama dhe Ministres së Mbrojtjes Mimi Kodheli, ka qenë i pranishëm edhe ambasadori amerikan në Tiranë, Donald Lu, i cili e ka cilësuar aleancën e vendit tonë shumë të rëndësishme.

Në fjalën e tij, kreu i qeverisë, Rama, ka theksuar se Shqipëria e meriton qëndrimin në aleancën më të madhe ushtarake, ndonëse sipas tij sfidat janë shtuar.

“Mirënjohja u shkon anëtarëve të aleancës, – tha Rama. – Shqiptarët gjithnjë do t’i jenë mirënjohës NATO-s, e cila ka krijuar kushtet e një paqeje të re në të gjithë rajonin e më gjerë. Ne e meritojmë vendin në NATO. Sot është dita për të kujtuar Feti Voglin që dha jetën. Por pas 6 vjetësh, sfidat e aleancës janë shtuar. Qeveria shqiptare ka në fokus transformimet e FA-së, sepse NATO është aleanca e lirisë”, – shtoi Rama.