Shqipëria zhvillon stërvitjen zyrtare para sfidës me Bjellorusinë

Kombëtarja shqiptare zhvilloi paraditen e sotme stërvitjen zyrtare në prag të ndeshjes ndaj Bjellorusisë, e vlefshme për UEFA Nations League.

26 lojtarë u stërvitën normalisht, ndërsa Ernest Muçi zhvilloi disa ushtrime në palestër dhe nuk iu bashkua ekipit në fushë. Stafi mjekësor i Kombëtares vendosi ta lërë pushim si masë parandaluese, pas një goditjeje që lojtari mori në ndeshjen ndaj Finlandës.

Pjesa tjetër e ekipit u stërvit rregullisht në prag të sfidës së nesërme ndërsa Maran u fokusua duke provuar situatat e goditjeve standarde.

Gjatë ditës së sotme ekipi do të udhëtojë drejt Budapestit. Trajneri Rolando Maran dhe një lojtar i Kombëtares do të dalin para mediave në konferencën për shtyp, që do të zhvillohet në orën 18:30.

Kombëtarja shqiptare do të luajë nesër ndeshjen e fundit në UEFA Nations League ndaj Bjellorusisë, në orën 18:00, në stadiumin “Illovszky Rudolf Stadion”. A.V.

Ende nuk ka komente. Bëhuni i pari që komenton.