“Shqyrtimi i nismës për shfuqizimin e Gjykatës Speciale, vendim i dëmshëm për Kosovën”

Kreu i grupit parlamentar të partisë opozitare, Lidhja Demokratike e Kosovës (LDK), Avdullah Hoti, tha se nisma e deputetëve për shfuqizimin e Ligjit për Gjykatën Speciale i është dërguar Qeverisë së Kosovës për shqyrtim, me votat e shumicës së anëtarëve të Kryesisë së Kuvendit dhe me mbështetjen e “Listës Serbe”.

Hoti në një konferencë për media në Kuvendin e Kosovës, tha se Kryesia e Kuvendit të Kosovës, pa prezencën e LDK-së, me shumicë të votave vendosi që nisma e deputetëve për ta shfuqizuar Gjykatën Speciale t’i dërgohet Qeverisë që të marrë opinionin e saj.

“Ritheksoi se kjo është bërë me përkrahjen e Listës Serbe dhe se ky është një vendim i dëmshëm për institucionet e Kosovës dhe për shtetin e Kosovës. Është e pakuptueshme se si pas të gjithë këtyre përpjekjeve për t’i vetëdijesuar vendimmarrësit në Kosovë që të shkojë përpara kjo procedurë”, tha Hoti.

Ai më tej theksoi se LDK-ja, së bashku me partnerët ndërkombëtarë do të angazhohet për t’i bërë të qarta pasojat që do i ketë shteti i Kosovës nga qasja e shumicës parlamentare.

“Nuk ka shpjegim tjetër përveç se është një shpjegim tjetër i armiqve të Kosovës që ta izolojnë Kosovën, që t’i prishin marrëdhëniet me shtetet mike me BE-në dhe me SHBA-në, në veçanti që të kthejnë në vend rezolutën 1244 që të themelohet pastaj një gjykatë përmes Këshillit të Sigurimit (të OKB-së)”, tha Hoti.

Në të njëjtën konferencë, edhe deputetja tjetër nga radhët e LDK-së, Vjosa Osmani, e cila foli për dështimin e delegacionit të Kosovës javën e kaluar në Strazburg për konkluzionet midis Parlamentit Evropian dhe Kuvendit të Kosovës në takimin e Marrëveshjes së Stabilizim Asociimit, tha se kjo ka ndodhur për shkak se ka patur paragrafë në favor të Gjykatës Speciale.

“Kjo është bërë për shkak se deputetët e koalicionit qeverisës nuk kanë qenë të gatshëm të pranojnë një paragraf i cili kërkonte që lidershipi në Kosovë të vazhdojë të përkrahë funksionimin e dhomave të specializuara në përputhje me legjislacionin në fuqi”, tha Osmani.