Shtyhet gjykimi për ish-krerët e UÇK, reagon PDK: Vonesat tregojnë se procesi është politik!

Nuk ka vendim për ish krerët e uck në 19 maj. Togat e zeza do të shfrytëzojnë edhe 60 ditë shtesë për të dalë me gjykimin e tyre.

Arsyeja pas këtij vendimi ishte “kompleksiteti i rastit”, sipas Gjykatës Speciale.

Por, 20 korriku mund të mos jetë data më e largët e mundshme meqë u paralajmërua edhe një zgjatje tjetër në rast se “bëhet absolutisht e nevojshme” konfirmoi zëdhënësja e këtij institucioni Angela Griep.

Shpallja e aktgjykimit ishte parashikuar të bëhej më 19 maj, në përputhje me afatet procedurale.

Vendimi i ri vjen mes kritikave të shumta e protestave që e përcollën gjykimin e Hashim Thaçit, Kadri Veselit, Jakup Krasniqit e Rexhep Selimit për njëanshmëri e padrejtësi nga ana e Dhomave të Specializuara.

Ky lajm ka nxiti reagimin edhe të ish partisë së Hashim Thacit.

Partisë Demokratike e Kosovës, tha se “zvarritjet e pafundme e kanë kthyer procesin gjyqësor në Hagë në padrejtësi të institucionalizuar”.

Sipas saj, ky proces e ka humbur kuptimin e drejtësisë dhe është shndërruar në një proces të ndikuar nga kalkulimet politike.

Ndërsa, ish këshilltari i Thaçit, Artan Behrami, këtë shtyrje e lidhi me datën e zgjedhjeve në Kosovë duke ngritur edhe njëherë pyetjen nëse kjo gjykatë është e drejtësisë ndërkombëtare apo e politikës?

Në shkurt të këtij viti, katërshja e UÇK-së dhanë fjalët përfundimtare në Hagë duke u deklaruar sërish të pafajshëm dhe duke thënë se akuzat ndaj tyre nuk janë provuar gjatë gjykimit.

Por, një ditë pas shtyrjes së afateve, sic e kishin lajmëruar, veteranët e luftës dorëzuan në këtë gjykatë 200 mijë nënshkrime të peticionit në mbështetjë të krerëvë të luftës çlirimtare.